Ka nisur evakuimi për banorët e pallatit që rrezikonte shembjen nga rreshqitja e dherave në Gjirojastër. Pas kundërshtimit për tu larguar nga banesat ditën e djeshme, sot pesë familje janë evakuuar dhe janë strehuar në konviktin e shkollës pedagogjike dhe 13 familje të tjera janë strehuar tek të afërmit e tyre. Rrëshqitja e tokës rrezikon edhe një vilë dy katëshe. Pallati është rrethuar dhe ruhet nga policia bashkiake ndërkoh pritet raporti përfundimtar nga specialistët e gjeologjisë.
Kujtojmë që ditë më parë nga rrëshqitja e dheut në këtë lagje të qytetit të Gjirokastrës është krijuar një çarje me gjatësi rreth 100 metra, madje të frikësuar nga rreziku që u kanoset, banorët e pallatit braktisën banesat e tyre gjatë natës.
Cfarë ka ndodhur më parë:
Gjeologët thanë se bëhet fjalë për një emergjence të kategorisë së lartë, por disa prej tyre kanë qëndruar në banesë e të tjerë nuk kanë pranuar strehimin e ofruar nga Bashkia, e cila nga ana e saj thotë se banorët duhet të presin ekspertizën.
Pasi fjetën në makina, shumica e banorëve të pallatit të rrezikuar prej rrëshqitjes së dheut në Gjirokastër u larguan për të kaluar natën te familjarë dhe të afërm.
Një pjesë e banorëve qëndruan jashtë deri në orët e vona të së shtunës. Disa prej tyre zgjodhën ta kalojnë natën e dytë të rrezikut nga shembja në banesa.
Gjatë së shtunës, kreu i Gjeologjisë kërkoi evakuimin e gati 60 personave sepse rrëshqitja konsiderohet aktive dhe çarjet janë thelluar.
Përgatiti:AlpeNews.al
