Gentian Doda përçau Apelin/ Ja si votuan gjyqtarët Miri, Bendo e Skënderi

Më 7 qershor të vitit të Shkuar Gjykata e Apelit në Tiranë dha vendimin e formës së prerë për Gentian Dodën, fillimisht i dënuar me 20 vjet burg dhe më pas me 8 vjet pasi Gjykata e Matit ndyrshoi akuzën ndaj tij.
Përpara dhënies së vendimit, miq dhe të afërm të Dodës kishin nisur lëvizjet për të korruptuar Gjykatën dhe prokuroria kishte përgjuar të dyshuarit.
Një nga të arrestuarit komunikonte me kushëririn e gjyqtarit, pronari i një lokali në Fushë Krujë ku sipas pamjeve filmike janë dhënë edhe paratë. Bëhet fjalë për 30 mijë euro të cilat sipas prokurorisë dyshohet se i janë dhënë gjyqtarit Miri përpara dhënies së vendimit.
Në rutinën e përditshme, Gjykata e Apelit verifikon vetëm ligjshmërinë e vendimit dhe anën formale të tij pa u future në fakte apo themelin e çështjes. Për këtë arsye, vendimet e kësaj gjykate janë me shumicë të plotë në çdo rast, qofshin pro apo kundër palës kërkuese.
Por në rastin e Gentian Dodës, ka ndodhur ndryshe. Tre anëtarët e trupit gjykues: Shkëlqim Miri, Agim Bendo dhe Flutura Skëndëeri, nuk kanë qenë në një mendje nëse vendimi i shkallës së parë duhet të lihej në fuqi apo jo.

Referuar vendimit të datës 7 qershor rezulton se gjyqtarët Agim Bendo dhe Shkëlqim Miri Relator kanë votuar pro vendimit të Gjykatës së Matit që dënonte me 8 vjet burg Gentian Dodën, pasi i kishte ndryshuar akuzën nga vrasjes në rrethana të tjera cilësuese në plagosje të rëndë me dashje.
Ndërsa gjyqtarja e tretë e kolegjit, Flutura Skënderi ka patur tjetër mendim për zgjidhjen e çështjes dhe ka votuar kundër vendimit të Gjykatës së Shkallës së Parë Burrel.
Kjo përçarje e gjyqtarëve ka qenë një element i rëndësishëm për hetuesit, të cilët kishin zbuluar lidhjet e familjarëve të Gentian Dodës me kushëririn e gjyqtarit Shkëlqim Miri.
Por nga verifikimit e prokurorisë nuk rezulton të jetë përfshirë në këtë çështje gjyqtari Agim Bendo, i cili ka votuar për lënien të fuqi të vendimit që favorizonte të akuzuarin për dy vrasje.