Është bërë tashmë traditë që në shtator, Forcat e Armatosura Shqiptare zhvillojnë stërvitjen në poligonin kombëtar të Bizës në Martanesh. Mbi 1 mijë trupa dhe mbi 200 mjete morën pjesë në stërvitjen e cila përmbushi objektivin e saj numër një: Certifikimin nga NATO si e gatshme për luftim. Grup-batalioni i Këmbësorisë së Lehtë ka testuar gadishmerine luftarake. Gjatë tre ditëve sfiduese grup-batalioni iu nënshtrua vlerësimit operacional në përputhje me sistemin CREVAL te NATO-s. Ushtarakët në testim implementuan me saktësi gjithçka u kërkua duke demonstruar force dhe operacionalitet. Grupi i vlerësimit dhe i monitorimit nga komanda e Komponentit Tokësor të Aleancës ne fund deklaroi se grup batalioni i lehtë i këmbësorisë plotëson standardet dhe certifikohet “Combat Ready”pra i afte për të kryer gjithë spektrin e operacioneve tokësore në rast se Aleanca i kërkon. Certifikimi ka vlerë 4 vjet.
Momenti më kulminant ishte ekzekutimi i stërvitjes ku u demonstruan një sërë skenarësh të bazuar në manualet më të mira të NATO-s sa i takon kapaciteteve të luftimit. Demonstrimi nisi me kapacitetet e reja te shtuara siç ishte sistemi i zbulimit me dronin Puma i cili mori pamjet nga fusha e betejës dhe pa aktivitetin e armikut në zonën e operacionit. Skenari vijoi me lëvizjet në fushe beteje dhe me hapjen e zjarrit nga mjetet e blinduara me lëvizshmëri të lartë ndërsa municioni luftarak i përdorur ishte i gjeneratës së fundit. Pjesë e demonstrimit ishte dhe tërheqja e të plagosurve me helikopter. Në fund, elita e Forcave te Armatosura, forcat speciale kapën rob shtabin e armikut. “Risi e stërvitjes Biza-22 ishte integrimi i kapaciteteve të reja të futura në Forcat e Armatosura, duke filluar nga mjeti pa pilot, droni Puma, deri tek mjetet e reja komunikimit, të cilat janë të nivelit të kriptimit të lartë dhe të sigurt. I gjithë armatimi i efektivëve të nën reparteve të Grup Batalionit të Këmbësorisë së Lehtë është i standardeve të NATO-s, me kalibra të ndryshëm. Në përfundim të certifikimit sipas standardit CREVAL të NATO-s, kjo strukturë është e gatshme për tu dislokuar brenda 180 ditëve. Detyra që na u la nga ekipi i vlerësimit të NATO-s është implementimi i STANAG-eve të Aleancës”-,tha për News 24, major Ervin Lakuriqi, shef i operacioneve pranë GBKL.
Ministri i mbrojtës Niko Peleshi tha se ky grup batalion është gati për tu dislokuar në rast se kërkohet nga Aleanca për të mbrojtur sigurinë kolektive. “Kërkesa e Aleancës për certifikimin dhe rritjen e nivelit të gatishmërisë të forcave të saj, bëhet edhe më “imediate” sot në realitetin e ri të sigurisë, të cenuar rëndë pas agresionit ushtarak të Rusisë ndaj Ukrainës. Mbrojtja e territoreve të Aleancës është detyra parësore e jona dhe aleatëve tanë, një detyrë të cilën, nuk na lejohet të mos e përmbushim”-,tha ministri Peleshi gjatë ceremonisë se certifikimit të GBKL. Për News 24, ushtarakët pjesëmarrësit shprehen se ishte një ndër më impenjativet dhe vlerësimi që u bë nga NATO është krejt i meriturar, pasi u arrit me mund dhe sakrifica.
