Fillimi i vitit të ardhshëm e gjen qeverinë europiane të futbollit (UEFA), në një garë të ethshme për të caktuar kreun e ri të këtij institucioni. Në këtë garë, i pari që ka shpallur kandidaturën është kreu aktual, Aleksander Ceferin.
Lidhur më këtë garë që do të bëhet në UEFA, Federata Shqiptare e Futbollit ka dalë hapur në mbështetje të Ceferin. Përmes një njoftimi zyrtar për mediet FShF ka bërë me dije se do të mbështesë Ceferin për t’i dhënë atij mundësinë që të vazhdojë me reformat e nisura këto dy vite.
“Pas zyrtarizimit të kandidaturës së kreut aktual të UEFA-s, z. Aleksander Ceferin për një mandat të dytë në drejtimin e organizmit më të lartë të futbollit europian, FSHF dhe Presidenti Armand Duka kanë shprehur mbështetjen ndaj Presidentit Ceferin në zgjedhjet e ardhshme që do të zhvillohen në Kongresin e radhës së UEFA-s në Rome me 7 Shkurt 2019.
Presidenti Duka në letren e tij drejtuar kreut të UEFA-s theksoi rëndësinë e këtij vendimi për ti dhënë vazhdimësi punës dhe zhvillimit të futbollit Europian. Investimeve dhe përmirësimit të imazhit të futbollit. FSHF mbështet kandidaturën e Presidentit të UEFA-s Aleksander Ceferin”, shkruhet në njoftimin e FShF-së.
Sakaq në garën për kreun e UEFA përveç sllovenit Aleksander Ceferin ende nuk është shpallur ndonjë kandidaturë tjetër. Ceferin e mori kreun e UEFA pas largimit të Platini për shkak të skandalit të korrupsionit që pati shpërthyer.