Kandidatët për drejtor të përgjithshëm të Policisë së Shtetit këtë të martë kaluan në fazën e dytë atë të intervistimit nga komisioni i posaçëm i ngritur pranë Ministrisë së Brendshme i përbërë nga zv/ministrja e Brendshme Silva Caka, sekretarja e Përgjithshme e Ministrisë së Brendshme, Kledia Ngjela dhe kreu i AMP-së Eduart Merkaj.
Siç raporton gazetarja e Top Channel Dorjana Bezat, procesi i zgjedhjes së pasuesit të Ilir Prodës përveç instrumenteve shqiptarë pati vëmendjen edhe të ndërkombëtarëve.
Ndërkohë që kandidatët dilnin para komisionit sipas rendit alfabetik ministria e brendshme u vizitua nga diplomatja amerikane, Nancy VanHorn.
Fazën e parë atë të verifikimit të dosjeve të vetëdeklarimit nuk e kanë kaluar vetëm dy gratë që ishin në listën e 16 kandidatëve: Ejona Gurbardhi dhe Suela Sulkaj të dyja juriste vinin jashtë radhëve të Policisë së Shtetit. Nga verifikimi i dosjeve të tyre rezultoi se ato nuk plotësonin kriteret ligjore për të aplikuar për post.
Garën e vijojnë 14 kandidatët e mbetur të cilët vijnë me eksperienca të mëparshme në drejtimin e drejtorive të qarqeve apo departamenteve konkretisht postin e kryepolicit e synojnë 3 drejtorë departamentesh Pëllumb Seferi, Neritan Nallbati dhe Saimir boshnjaku.
Në garë janë dhe 4 drejtor qarqesh, Skender Hita, Elidon Çela, Afrim Tafa dhe Gentian Berberi. Po ashtu Arjanit Arapi. Ndërsa nga akademia e sigurisë konkurrojnë 6 kandidatë Alfred Çepe, Rebani Jaupi, Lorenc Panganika, Idejet Faskaj, Tonin Vocaj dhe Gentjan Shehaj.
Pas intervistimit, të gjithë kandidatët do të pikëzohen dhe lista e rezultateve do t’i dorëzohet ministrit të Brendshëm Besfort Lamallari.
Mes kryesuesit të listës kryeministri Rama do të përzgjedhë pasuesin e Ilir Prodës.
