Një gjykatë në Stamboll këtë të premte ka dënuar kryetaren e Partisë Popullore Republikane (CHP) për Stambollin, Canan Kaftancioglu, me pothuajse 10 vite burg për disa postime në Twitter vite më parë.
Nëse dënimi konfirmohet edhe nga Gjykata e Apelit, Kaftancioglu do të kalojë 9 vite, 8 muaj dhe 20 ditë pas hekurave nën akuzat për “përhapje të propagandës terroriste” dhe “fyerje ndaj figurave publike, përfshirë Presidentin Recep Tayyip Erdogan”.
Vetë 47-vjeçarja e cila njihet si gruaja që i mori Stambollin Erdoganit pas 25 vitesh, sëbashku me kandidatin e CHP për metropolin turk, Ekrem Imamoglu, tha se vendimi për ta dënuar ishte marrë në zyrën e Presidentit.
“Koha jonë ka filluar, ai humbi. Ne fituam, 80 milionë turqit fituan. Nuk do të heq dorë nga mendimet dhe fjalët e mia pavarësisht verdiktit. Koha jonë ka filluar, ai humbi, ne fituam”, tha Kaftancioglu, e cituar nga Hurriyet, duke iu referuar fitores së thellë të partisë së saj më 23 Qershor në zgjedhjet lokale në Stamboll.
Kaftancioglu do të qëndrojë e lirë deri në aprovimin e dënimit edhe nga Gjykata e Apelit.
Në seancën e sotme gjyqësore Kaftancigolu shoqërohej në gjykatë nga mijëra persona, përfshirë kryebashkiakun e Stambollit, Ekrem Imamoglu, aktivistë të të drejtave të njeriut, zyrtarë të konsullatave nga shumë shtete, etj.
Tepër i ashpër në reagimin e tij ishte kryetari i partisë opozitare, CHP, Kemal Kiliçdaroğlu, i cili tha se “në këtë shtet nuk ka drejtësi. Në momentin që merr vendimin, gjykatësi nuk ddëgjon ndërgjegjen e tij, por pallatin Presidencial”.
