Ju kujtohet mesiguri fustani gjigand i verdhë që bëri namin në internet kur Rihanna u shfaq në evenimentin Met Gala. U deshën 3 persona që ta ndihmonin këngëtaren të ecte pa problem me një fustan që më tepër dukej si pellush.
Por a e merrni dot me mend sa njerëz kanë punuar dhe sa orë u është dashur për një të tillë? Guo Pei, personi që stiloi fustanin e famshëm, punësoi 300 qëndistarë dhe 150 stilistë të tjerë. Ata qëndisën për 2 vjet duke vendosur 30.000 perla reale dhe mendohet se fustani u shit për 500.000 £. Por çfarë janë këto fustane që kushtojnë më shumë se një shtëpi?
Fustanet haute couture njihen edhe si arti i të qepurit me dorë. Veshjet e tilla janë të bëra me dorë gjatë gjithë procesit, qoftë në vendosjen e gurëve, perlave ose fijeve të ndryshme.
Shtëpitë më të famshme të modës si Valentino, Jean Paul Gaultier, Dior, Chanel etj, duan minimumi 1000 orë për të realizuar një qëndisje dhe qepje perfekte, ndërsa 150 orë për një veshje të thjeshtë.
Kur vjen puna tek çmimi, me veshjet haute couture nuk ka kompromis: 9000 euro është çmimi më i vogël për të patur një fustan të tillë, por zakonisht shifra shkon në qindra dhe mijëra, duke llogaritur orët e punës dhe materialet që janë përdorur.