Fundjavë kampionësh, Hamilton dhe Marquez pranë kurorëzimit

Në Formula 1 dhe MotoGp kjo fundjavë do të jetë vërtetë e veçantë pasi të dielën Lewis Hamilton dhe Marc Marquez kanë shansin ideal për t’u shpallur edhe zyrtarisht kampionë Bote. Të dy janë vetëm një hap larg triumfit dhe si për ironi të fatit, si Hamilton ashtu edhe Marquez do të fitojnë titujt e tyre të 4-t në karrierë.  Në Formula 1 britanikut Hamilton do t’i mjaftonte vendi I 5-të në garën e Meksikës për të fituar zyrtarisht titullin, ndërkohë që ka edhe shumë kombinime të tjera që anglezi të shpallet kampion Bote, në varësi të pozicionimit që do të ketë në garë ndjekësi i tij në klasifikimin e përgjithshëm, gjermani Sebastian Vettel, ndaj të cilit Hamilton ka 66 pikë avantazh. Në MotoGp, dy gara përpara fundit spanjolli i Repsol Hondas numëron 33 pikë epërsi ndaj rivalit të tij, italianit Dovizioso. Në garën e Malajzisë në pistën e Sepang këtë fundjavë Marquez mund të shpallet kampion Bote për herë të 4-t në MotoGp, nëse fiton ose e mbyll garën në vendin e dytë. Titulli do të shkonte zyrtarisht në duart e iberikut edhe nëse Marquez pozicionohet i 3-ti ose i 4-ti dhe Dovizioso nuk fiton garën, ndërsa ka edhe shumë kombinime të tjera që do të sillnin suksesin e spanjollit. Në Formula 1 dhe MotoGp, sipas të gjitha gjasave do të jetë një e dielë kampionësh.