Për ata që shkojnë drejt jugut, një pjesë e rrugës që duhet të përshkojnë është kthyer në makth. Ashtu si çdo vit, një trafik i rënduar është ndeshur këtë të shtunë 21 korriku në aksin rrugor Fier-Levan. Shkak i këtij trafiku është rritja e fluksit të pushuesve drejt bregdetit të jugut për fundjavë.
Trafiku i automjeteve nis prej unazës lindore të Fierit dhe ka vazhduar deri në Levan ku ndahen drejtimet e lëvizjes për në Tepelenë. Përgjatë gjithë këtij aksi rrugor prej gati 9 km ka qenë i ngarkuar në trafik nga vargu i automjeteve të pushuesve.
Ndryshe nga herët e tjera ky aks rrugor nuk ka pasur prezencë të punonjësve të policisë së qarkullimit. Fluksi i makinave shkonte në të gjithë gjatësinë e rrugës Fier-Levan duke vijuar edhe brenda në qytet. Qytetarët kanë pritur me orë të tëra për të bërë këto 9 kilometra.
Shkak i kësaj situate është mos përballimi i këtij trafiku nga aksi në fjalë Levan-Fier e cila është tepër e ngushtë. Kjo është rruga e vetme, nga ku duhet të kalojnë të gjithë ata që kanë si destinacion Vlorën e përtej por edhe për në Tepelenë e Gjirokastër.
