Në rubrikën tonë të përditshme ” Spring në Alpe”, kemi zgjedhur t’iu sjellim pamje nga fshati piktoresk, Lini në Pogradec.
Lini është një nga fshatrat më interesant dhe më piktoresk në Shqipëri. Ai, i vendosur në një kodër të bukur buzë liqenit të Pogradecit, zgjon kuriozitetin e çdo udhëtari apo turisti që udhëton në rrugën Qafë Thanë – Pogradec, e cila kalon fare pranë fshatit.
AlpeNews.al ju sjell pamje nga fshati turistik Lin, në Pogradec.
Me shtëpitë e vogla të ndërtuara buzë ujit, në shpinën e një kodre jo shumë të lartë, me rrugica të vogla e të ngushta, të shtruara me gurë të vegjël, ku vështirë se mund të kalosh me makinë, zgjon interesin e gjithë vizitorëve apo turistëve vendas e të huaj.
Në Lin ka disa plazhe të këndshëm me ujë të kristaltë, me rërë dhe guralecë të vegjël. Një vend i bukur për piknik është edhe vendi i quajtur “Mulliri i Vjetër”, me burime gurgulluese dhe hije të freskëta pemësh.
Përgatiti: AlpeNews.al
