Java e 23-të e kampionatit gjerman do të mbyllet mbrëmjen e së dielës me ndeshjen që do të luhet në “Commerzbank-Arena” mes Frankfurt dhe Leipzig. Vendasit kanë reaguar pas humbjes 3-0 të pësuar në transfertë kundër Augsburg duke realizuar katër gola në fitoren e marrë javën e fundit kundër Koln.
Ata janë në vendin e gjashtë ë renditjes, por mund të bëhen pjesë e katër të parëve në rast të një fitoreje sot. Leipzig, nga ana tjetër, do të paraqitet në këtë ndeshje pas fitores së rëndësishme që kanë marrë në fushën e Napoli-t, ndeshje e vlefshme për 1/16-at e Europa League.
Ajo ka qenë fitorja e tyre e tretë radhazi dhe mbrëmjen e sotme do të kërkojnë të katërtën radhazi për t’u ngjitur në vendin e dytë të Bundesliga-s. Kjo do të jetë përballja e katërt mes këtyre dy ekipeve.
Frankfurt nuk ka arritur ta fitojë kurrë ndaj Leipzig, që ka marrë dy fitore dhe një barazim në tri ndeshje. Miqtë kanë fituar 2-1 në ndeshjen e fazës së parë dhe në tre takimet e mëparshme mes këtyre dy skuadrave janë realizuar 3 ose më shumë gola.
