Albanian Street Style është një faqe e njohur tashmë, si një vend ku gjen gjithë blogeret shqiptare, por dhe vajza që shquhen për stilin.
Edhe pse me më pak ‘followers’ sesa disa nga vajzat që janë pjesë e saj, sërish ajo ka ndjekësit e saj dhe ka krijuar një traditë të vetën në më shumë sesa një vit, që ka hapur llogari në Instagram.
Mbështetur në aktivitetin e këtyre ndjekësve, faqja ka publikuar fotot që janë parë më shumë gjatë vitit 2017.
Shohim fotot e Lori Hoxhës, Jonida Maliqit, Estela Ujkës, por dhe të fashionisteve të tjera, që mund të kenë më pak ndjekës, por jo më pak stil. Shohim veshje të shtrenjta, kombinime të studiuara, por gjithmonë është stili që del në plan të parë.
Dhe ndërkohë, nuk mund të themi që nuk habitemi, kur shohim që në vend të parë nuk është as Lori Hoxha, as Jonida Maliqi e as ndonjë blogere tjetër që ka më shumë ndjekës sesa Albanian Street Style, por një vajzë, që deri tani ka vetëm 10 mijë ndjekës.
Fotoja më e parë e 2017-ës në këtë faqe është një foto e Erisa Kurtit, një imazh vjeshte i publikuar në nëntor, ku fashionistja ka flokët topuz, një palë vathë të gjatë, një golf të plotë të kafenjtë dhe një gotë pijeje të ngrohtë në dorë. Duket një foto e shkrepur diku në New York, por marka mbi gotë dhe shënimi në foto, tregon që Erisa ndodhet në Tiranë, ndërsa fotoja është shkëputur nga editoriali i modës së revistës Living.
Pas saj vjen një foto e Vanesa Gjinit, ku Tirana është dhe më e dallueshme, ndërkohë që fotot e tjera kanë një diferencë të dukshme shikimesh.