Një zero e vetme shumë herë mund t’ju prishë punë pafund. Këtë e di mirë kuzhinieri i një ekipi olimpik në Norvegji, i cili kishte dhënë një porosi për plotë 15 mijë vezë, kur realisht donte të porosiste vetëm 1500 prej tyre.
Kuzhinierët, përdorën Google Translate për të përkthyer kërkesën për vezë në gjuhën koreane dhe e dërguan direkt më pas në një supermarket lokal.
Shefi i kuzhinës, Stale Johansen tha gjatë një interviste për “Norway’s Aftenposten”, thanë se kishin menduar që kishin porositur vetëm 1500 vezë në supermarketin koreano-jugor, por që për çudinë e tyre u kishin ardhur plotë 15 mijë të tilla.
Fillimisht ata menduan se bëhej fjalë për ndonjë ngatërresë të shoferit, por më pas u detyruan të kthenin pas një pjesë të ngarkesës dhe fatmirësisht, supermarketi e kuptoi se bëhej fjalë vetëm për një gabim, duke pranuar kështu tepricën e vezëve.
Nuk është e qartë se si ndodhi gabimi, por gazetari korean i BBC, David Cann, thotë se gjuha koreane ka një sistem tjetër të numërimit dhe një fjalë mund të ketë kontribuar te gabimi në fjalë.
