Një garë tepër e ndezur midis Bashkim Finos dhe Armand Dukës ka përfunduar sot me rizgjedhjen e këtij të fundit për herë të pestë radhazi në krye të FSHF-së.
Fino erdhi nga radhët e PS, si një kandidaturë me një vizion ndryshe dhe me synimin për të ridimensionuar totalisht institucionin më të lartë të futbollit shqiptar.
Përtej rivalitetit, sot në Asamblenë Zgjedhore të FSHF, Duka dhe Fino para nisjes së votimit kanë shkëmbyer batuta të ndryshme me njëri tjetrin, e më pas do të vijonin duke pirë kafe në ambjentet e hotelit Adriatik.
Kaq do të mjaftonte për t’i dhënë një atmosferë tjetër garës përpos polemikave dhe rivalitetit.
Në përfundim të votimit Fino do të tregonte edhe njëherë ‘Fair Play’ ndaj kundërshtarit duke e uruar për fitoren, dhe duke i dhuruar një përqafim miqësor, megjithëse u shpreh se procesi ishte i parregullt dhe do e çonte në CAS dhe FIFA./Alpenews.al/
