Maturantët që aspirojnë një vend në Universitetin e Mjekësisë, do kenë më shumë mundësi përzgjedhjeje degësh, ndërsa do të duhet të mësojnë shumë për provimet e maturës, pasi do të kenë më shumë peshë se vitin e kaluar.
Këto janë dy risitë e formulës së re të përllogaritjes së pikëve në një prej universiteteve më të reja publike, njëherësh ndër më të preferuarit, Mjekësia. Senati Akademik ka marrë vendimin ditë më parë, për pranimet e reja në vitin e ardhshëm akademik, 2019-2020. Fituesit do të përcaktohen në bazë të rezultateve të përgjithshme në gjimnaz, ato në katër provimet e maturës dhe në tri lëndët formuese për një mjek të ardhshëm.
Këto të fundit do të vijojnë të kenë 30% të peshës së pikëve totale, ndërsa ndryshe nga një vit më parë, ku 70%-shi ndahej proporcionalisht midis dy treguesve të mësipërm, sivjet vlera më e madhe 40% i është dhënë notës mesatare të provimeve të Maturës Shtetërore dhe 10% notës mesatare të gjimnazit.
Risi janë dy degë që do të hapen këtë vit: Higjienist dhe Teknikë Dentare, të cilat si fillim do të pranohen me notën mesatare më të ulët të mundshme që ka njohur ky universitet, 7. Sakaq, në dhjetë profilet e tjera të studimit nuk ka ndryshuar asgjë. Kusht për aplikimin në tri degët e shumëkërkuara: Mjekësi e Përgjithshme, Farmaci dhe Stomatologji është nota mesatare e gjimnazit, e barabartë ose më e madhe se 8.5, në Shëndet publik 8 dhe 7.5 në gjashtë degët e Fakultetit të Shkencave Mjekësore Teknike ose Infermierisë.
Përpos kritereve, Senati ka miratuar dhe numrin e studentëve që do të pranojë. Bëhet fjalë për 1,142 të rinj për programet e ciklit të parë dhe ato të integruara 5-vjeçare, të cilat ndahen në 1,040 vetëm për studentët brenda vendit, 88 nga trojet dhe pjesa tjetër midis personave me aftësi të kufizuara, jetimëve dhe ballkano-egjiptianëve.
Gara në universitete sapo ka nisur. Ka përfunduar plotësimi i Formularit A1 dhe maturantët kanë dy muaj kohë për t’u përgatitur për sezonin e provimeve me detyrim e me zgjedhje përgjatë qershorit.
