Ministri i Bujqësisë, Niko Peleshi, sqaroi deputetët socialistë se si do të ndahet fondi prej 94 milionë eurosh për bujqësinë, e dhënë nga Komisioni Europian dhe qeveria shqiptare.
Në një takim të posaçëm sektorial, me fokus mbështetja e fermerëve për të qenë përfitues të skemave bujqësore, Peleshi deklaroi sot se fermerët mbështeten nga fondi më i madh në këto 27 vite me 94 mln euro.
“Dua të përsëris lajmin e mirë nga KE për miratimin e programit më të madh që bujqësia shqiptare ka pasur, 71 mln euro, 23 mln euro nga qeveria shqiptare, pra 94 milionë euro për bujqësinë. Kjo është një mundësi dhe një sfidë e madhe për ne. Çdo fermer mund të aplikojë pa paraqitur asnjë dokument, por vetëm duke plotësuar një formular me të dhëna. Do i drejtohen agropikave, që janë sportele unike ku AZHBR do të jetë më pranë fermerëve, që këta të dinë si të përfitojnë dhe të marrin ndihmë nga fondi i garancisë” u shpreh Peleshi.
Ai komentoi edhe protestën e opozitës, duke e cilësuar kauzën të vjetër. “Jam gati për diskutim dhe ballafaqim me të gjithë deputetët e grupeve parlamentare, qoftë dhe në selitë e tyre. Por, për fat të keq, opozita ka një axhendë të vjetruar” tha ai.
Kryetari i Grupit Parlamentar, Taulant Balla, akuzoi aleatin e djeshëm, LSI, që ka drejtuar Autoritetin e Kontrollit Ushqimor. “Qeveria ka filluar një reformë të thellë në të gjitha institucionet, që lidhen me prodhimin bujqësor dhe kontrollin e ushqimit. AKU, pavarësisht se ne kemi drejtuar qeverinë shqiptare në katër vitet e shkuara, është një histori që duhet harruar nëse duam të arrijmë standartet e vendeve europiane ku ne kërkojmë të integrohemi”, tha kryetari i Grupit Parlamentar Balla.
Më tej, Peleshi shpjegoi se skema kombëtare e mbështetjes financiare është 20 milionë euro dhe i fokusuar në 15 produkte kryesore si bimët mjekësore, domatja, kastraveci, molla, bostani, ulliri, vreshtaria, speci, lajthia, arra, gështenja, lakra, lulelakra. Ndërkohë, ai ka vijuar më tej me ndarjen e fondeve që do të shpenzohen në secilin drejtim. Sipas tij, prioritet do t’i jepet mbjelljes së pemëve të reja, drurëve frutorë, serave diellore ku do të investohen rreth 7 milionë dollarë.
Sa i takon investimeve në grumbullim dhe përpunim, Peleshi tha se në këtë drejtim janë parashikuar rreth 7.3 milionë dollarë, ndërsa 3.2 milionë dollarë do të shkojnë për agroturizmin. Programi IPARD II nis zbatimin në pranverë të këtij viti dhe do të shtrihet deri në vitin 2023. Ministria e Bujqësisë bën të ditur se, ky program do të financojë grand 65% të investimit, në krijimin e fermave të reja ose zgjerimin e kapaciteteve prodhuese të fermave ekzistuese të akuakulturës.
