“Përfaqësuesit e mi ligjor po punojnë prej disa ditësh pikërisht për të bërë një kallëzim në Prokurorinë e Tiranës për fyerje dhe për shpifje, por ajo që është e rëndësishme është që po punojmë krahas me këtë që të bëjmë kallëzim edhe ne si parti në mënyrë që prokuroria e Tiranës të investohet për atë çka ka ndodhur realisht në drejtim të Shqipërisë, pra financimin e mediave shqiptare”. Deklarata u bë nga kreu i PDIU-së Shpëtim Idrizi.
I ftuar në “Provokacija”, kreu i PDIU-së Shpëtim Idrizi tha se lista me emra të disa personaliteteve shqiptare që thuhej se kishin përfituar fonde sekrete greke u bë për të zhvendosur vëmendjen nga hetimi në Athinë për këtë rast. Gjithashtu, sipas Idrizit kjo është lojë politike. Madje sipas kreu të PDIU-së, ai ka qenë tabela e qitjes nga mediat.
“Prokuroria e Athinës ka hapur një hetim për fonde sekret shtetërore në drejtim të Shqipërisë dhe që kemi një prononcim edhe të Tsiprasit dhe të Kotziasit që ky është lajmi i vetëm dhe serioz që duhet të merreshim të gjithë. Për ta zhvendosur nga kjo dhe për lojë politike gazeta “Dita”, Jeta Osht Qef, Pamfleti dhe disa të tjera, jo të gjitha mediat e tjera sigurisht që kishin qejf që të peshkonin dhe emrin e Shpëtim Idrizit. Kam përshtypjen Muçi që… më fal që po t’i heq spaleteta, por besoj që ju të tjerët jeni efekt kolateral aty. Jeni sa për të mbushur sepse për t’i dhënë kredibilitet kësaj liste ishte dhe Noizy dhe Olta Gixhari, shumë personazhe të nderuara në fushat e tyre”.
“Ti mendon se tabela e qitjes ka qenë Shpëtim Idrizi”, u pyet kreu i PDIU-së.
Idrizi pohoi:“Besoj që kam qenë unë për shkak të shumës së parave dhe për shkak se dy ditë më parë kisha bërë një deklaratë shtypi ku i kërkoja prokurorisë së Tiranës që të hapeshin hetimet si në Athinë për të investiguar faktin që në atje kishte dalë një lajm dhe që në drejtim të Shqipërisë janë lëshuar një sërë fondesh sekrete e pranuar nga Tsipras dhe Kotzias”.
Lidhur me këtë çështje, ai tregoi gjithashtu se burimi i parë i lajmit ka qenë një blog i cili ishte hapur vetëm prej pak ditësh.
Interesant ishte fakti që Idrizi kërkoi që në studio të futej me një flamur shqiptarë në tryezë dhe kështu ndodhi. Ndërsa, në fund të emisionit, Idrizi dhe gazeta Mustafa Nano ranë dakord të shkojnë në Çamëri së bashku.
