Monika Kryemadhi, ka mbërritur me urgjencë në Teatrin Kombëtar, pas shqetësimit të aktivistëve, për një plan të mundshëm të autoriteteve, për shembjen e godinës mbrëmjen e sotme.
Kryemadhi tha se ka patur një situatë, por tashmë gjendja duket e qetë. Ajo tha se opozita do ta mbrojë godinën, madje u zotua se do t’u dalë fadromave përpara.
“Pati një lloj intensiteti, por tashmë situata është e qetë.
Policët janë ata që po vuajnë më shumë se kushdo. U bëj thirrje qytetarëve, të mos provokohen me policët. Ata janë vala e parë e përballjes me këtë situatë çmendurie.
Ne do të qëndrojmë, do të ketë politikanë që qëndrojnë gjithë natën. Absurditeti është jashtë çdo norme edhe këtë e presim.
S’ka nevojë për forcë, nëse vijnë fadromat, Kryemadhi dhe Basha do të jenë këtu, të hypin mbi trupat tanë.
Mendoj që forcat e policisë janë bërë me kërkesë të politikës. I ka dëshpëruar tërheqja e aktorëve, që thonë se nuk kanë firmosuar për shembjen e Teatrit. Ka qenë një frikë, ose një panik.
Imazhi që ka krijuar lëvizja e Teatrit, ka patur qëndresë qytetare dhe ne politikanët duhet të mësojmë prej tyre“, tha Kryemadhi.
