Avokati Sokol Hazizaj në përfundim të vendimit të dhënë për ish Kryeprokurorin Adriatik Llalla mbështeti vendimin e dhënë duke e quajtur si një sukses të Reformës në Drejtësi përsa i përket vendimit që u dha nga KPA.
Sipas Hazizajt, klienti i tij ka bërë gjithçka konform ligjit.
“Sot ligji fitoi, rritet besimi i qytetarëve ndaj Reformës në Drejtësi. Gjykata dha vendim korrekt, të drejtë”, është shprehur avokati Hazizaj.
“Ndalimi për të hyrë në organet e drejtësisë deri në 15 vjet, që e kishte nënkuptuar edhe KPK. Me këtë sot, ligji fitoi, e drejta gjithashtu, sot mendoj se reforma në drejtësi ka marrë suksesin e parë. Karakteri universal apo i përgjithshëm i vendimit të KPA, do të jetë si udhërrëfyes, detyrim i vendimeve të tjera që janë në të njëjtin standard fakti dhe prove, nuk lë asnjë dyshim ky vendim, edhe detyrues”- tha ai.
Pyetur për nje hetim të nisur për Llallën, avokati nuk ka dhënë asnjë detaj. “Nuk kam informacion ligjor, në këto kushte sa kohë nuk kam marrë informacionin e duhur, risqaroj që e drejta proceduriale i imponon organit të më informojë kur është i regjistruar me emër procesi apo procedimi, nuk kam informacion të tillë”- tha ai.
