Dhjetëra studentë, pedagogë e qytetarë të Tiranës i janë bashkuar marshimit të heshtur në nder të 21 vjeçares. Kanë qenë studentët e fakultetit të drejtësisë ata që kanë qëndruar në rradhën e parë të marshimit, për të nderuar me lule dhe me prezencën e tyre, mungesën e shoqes së klasës, e cila humbi jetën tragjikisht të dielën.
Pikërisht në vendin ku Ariela Murati u qëllua dy ditë më parë me plumba nga personi që thoshte se e dashuronte, këtë të martë janë vendosur qindra lule, qirinj e lutje për shpirtin e saj. Ata kanë mbajtur një minut heshtje për Arielën e kanë thënë se drejtësinë për Arielën do ta vendosin ata.
UPDATE/
Studentët e vitit të tretë të Fakultetit të Drejtësisë do të marshojnë ditën e sotme në kryeqytet, në nder të ish-studentes Ariela Murati, e cila nuk do iu bashkohet më në auditorët e Fakultetit. Ariela u vra padrejtësisht ditën e diel nga 23-vjeçari Aldison Belulaj, pasi ajo i kishte refuzuar dashurinë.
Një ditë më parë, studentët e Drejtësisë, aty ku studionte dhe vetë Ariela, ndërprenë mësimin dhe shkuan në shtëpinë e të ndjerës, ku i dhanë lamtumirën e fundit mes lotësh dhe dhimbjes, ndërsa sot ata do të lënë sërish mësimin, duke i dhënë shoqes së tyre një tjetër lamtumirë.
Ndërsa sot ata do të përshkojnë një marshim të heshtur nga Fakulteti i Drejtësisë deri te vendi i ngjarjes makabre, ku u vra Ariela Murati, pranë Fakultetit të Mjekësisë. Marshimi i studentëve do të nisë në orën 10:00.
