Klubit të Flamurtarit nuk i del e keqja me gjyqtarin Eldorain Hamiti. Bregdetarët kontestojnë fort penalltinë e akorduar nga kryesori lezhjan për Kukësin, prej nga erdhi edhe barazimi 1-1.
Përmes faqes zyrtare të Facebook, kuqezinjtë e kanë etiketuar “Snajperisti Hamiti” kryesorin e sfidës së luajtur në “Zeqir Ymeri”, në kuadrin e javës së 18-të të Superiores. Ja statusi i klubit vlonjat: “Misioni është i përmbushur: përveç penalltisë së dhënë kundër, mohoi një penallti mëse të qenë për ne. Dha edhe karton të kuq për Sibiden, sepse nuk e besonte “porositësin” që kishte 3 kartonë të verdhë dhe duhej të mungonte patjetër ndeshjen e radhës. Vazhdojmë përpara, të vetëm kundër të gjithëve”.
Në këtë linjë ishte edhe trajneri Shpëtim Duro, që pa u larguar nga stadium i Kukësit lëshoi akuza të forta: “Kukësi ishte kundërshtar direkt dhe një pikë është shumë e rëndësishme, por ashtu si rrodhi ndeshja, jam i mërzitur, pasi merituam shumë më tepër. Arbitri Hamiti na ka sakatuar me drejtimin e lojës, duke na lënë pasoja edhe për ndeshjen e ardhshme. Ndaj, duke parë të gjitha këto, jam i gëzuar që dolëm me një pikë”.
