Antoine Griezmann beson se ai ka qenë një nga tre futbollistët më të mirë në botë për vitin 2018, prandaj e meriton një vend në podiumin e “Topit të Artë”. Sulmuesi i Atletico Madrid ka shijuar kulmin e karrierës së tij në verë, ndërsa luajti një rol të madh te Franca për fitimin e Kupës së Botës, duke u renditur i treti pas Luca Modric dhe Eden Hazard për “Topin e Artë” të “Rusia 2018”.
Dhe tani ai beson se e meriton një vlerësim të tillë për përpjekjet e tij gjatë një viti, në të cilin deri tani ka shënuar 23 herë për Atletico Madrid në 33 ndeshje, duke i ndihmuar të tijtë në fitimin e Ligës Europiane dhe Superkupës Europiane, në këtë proces.
“Unë e meritoj që të jem mes tre të parëve, – tha ai për “L’Equipe”, duke shikuar prapa në krahasim me vitin 2016, kur ai përfundoi i treti, pas Cristiano Ronaldos dhe Lionel Messit. – Atë vit kam humbur dy finale, këtë vit kam fituar tri të tilla, mjaftueshëm normalisht…”
Griezmann pranoi se ishte i habitur që as ai dhe as ndonjë nga shokët e tij të Francës nuk janë pjesë e listës së shkurtër për çmimin më të mirë të FIFA-s. “Është e çuditshme dhe kam keqardhje, – tha ai. – Ky është një trofe i dhënë nga FIFA, apo jo? Ne fituam Kupën e Botës dhe nuk ka asnjë francez në listën e ngushtë. Kjo është përzgjedhja, por më duket e habitshme”.
27-vjeçari ka qenë pjesë e Atletico Madrid që nga viti 2014 dhe ka shënuar 80 gola në 145 paraqitje për skuadrën e Diego Simeone, duke hedhur poshtë ofertat nga Barcelona kësaj vere, për të qëndruar me klubin kryeqytetas. Ai ka luajtur 61 herë me Francën, duke gjetur rrjetën në 24 raste. Në mesin e këtyre golave janë edhe katër rrjetat që ai ka shënuar gjatë finaleve të Kupës së Botës në Rusi