Kandidati për postin e presidentit të FSHF-së, Bashkim Fino, ka denoncuar skandalin e rradhës në lidhje me Shoqatat.
Përmes një reagimi në faqen e tij zyrtare në facebook, Fino publikon faktin se edhe katër Shoqatat e tjera ajo e Trajnerëve, Mjekëve Sportiv, Arbitrave të Futbollit si dhe Shoqata e Futsallit nuk janë të rregjistruara në Gjykatë.
Një denoncim që fakton qartë skandalin e FSHF-së që 12 Shoqatat nuk janë të rregjistruara.
“Pas 8 Shoqatave Rajonale, që u faktuan ligjërisht se nuk janë të regjistruara në Gjykatë, sot jam tronditur kur kam mësuar në mënyrë zyrtare që nuk janë të regjistruara as 4 Shoqatat e tjera.
Nëpërmjet vërtetimit nr. 156/1 Prot., i marrë nga Gjykata e Tiranës rezulton se nuk janë të regjistruara as Shoqata e Trajnerëve, Shoqata e Mjekëve Sportivë, Shoqata e Arbitrave të Futbollit dhe Shoqata e Futsallit.
Ky është një skandal i paprecedentë i një Federate, e cila për vite me radhë ka mbyllur sytë para këtyre “ndërtimeve pa leje”, që i kanë zënë frymën futbollit shqiptar me ilegalitetin e tyre’’, shkruan Bashkim Fino.
