Dy persona janë arrestuar nga Policia e Shkodrës mesditën e sotme në kuadër të operacionit të koduar ‘Mnela’.
Mësohet se janë sekuestruar 7 kilogramë kanabis sativa, ndërsa personat e arrestuar janë kapur në flagrancë duke përpunuar lëndën narkotike.
Burime zyrtare nga Policia e Shkodrës bëjnë me dije se në pranga kanë rënë 26-vjeçari me inicialet G.H., dhe 46-vjeçarja me inicialet D.Ç.
Sipas raportimeve, gjatë kontrollit të ushtruar nga efektivët e policisë në një kasolle, u gjetën 7 kilogramë kanabis.
Njoftimi i Policisë
Finalizohet operacioni policor i koduar “Mnela”, për goditjen e veprimtarisë kriminale në fushën e narkotikëve.
Sekuestrohen 7 kilogramë lëndë narkotike cannabis sativa.
Vihen në pranga 2 shtetas që u kapën në flagrancë duke përpunuar lëndën narkotike.
Në vijim të goditjeve të njëpasnjëshme dhe kontrollit masiv të territorit, me qëllim parandalimin e kultivimit dhe trafikimit të kanabisit, bazuar dhe në informacionet e marra në rrugë operative për disa shtetas që ushtronin veprimtarinë e kultivimit dhe prodhimit të kanabisit, specialistët për Hetimin e Krimeve në Seksionin e Hetimit të Krimeve kundër Trafiqeve të Paligjshme dhe Narkotikëve, në bashkëpunim me Forcën e Posaçme Operacionale në DVP Shkodër, kanë organizuar dhe finalizuar operacionin policor antidrogë të koduar “Mnela”, në kuadër të të cilit u bë kapja dhe arrestimi në flagrancë i shtetasve:
G. H., 26 vjeç, banues në Mnelë, Bashkia Vau i Dejes dhe D. Ç., 46 vjeçe, banuese në Mamurras.
Këta shtetas u kapën në flagrancë, në territorin e fshatit Mnelë, në një kasolle të përshtatur për tharje dhe përpunim të bimëve narkotike cannabis sativa.
Gjatë kontrollit u gjetën dhe u sekuestruan në cilësinë e provës materiale 7 kilogramë lëndë bimore cannabis sativa.
Strukturat hetimore të Drejtorisë Vendore të Policisë Shkodër, në bashkëpunim me Prokurorinë e Rrethit Gjyqësor Shkodër, vijojnë hetimet për identifikimin dhe vënien para përgjegjësisë ligjore edhe të personave të tjerë të përfshirë në këtë veprimtari kriminale.
Materialet procedurale i kaluan për ndjekje të mëtejshme Prokurorisë pranë Gjykatës së Shkallës së Parë Shkodër, për veprime të mëtejshme.
