Për disa ditë më rradhë, Festa e Bostanit ka mbledhur mijëra pushues në sheshin kryesor të Parkut Kombëtar të Karavastasë.
Prodhues dhe përpunues, ekspozuan dhe tregtuan për pushuesit, varietetet e ndryshme të bostanit si dhe gatime me bazë shalqini dhe pjepri.
Në natën e fundit të këtij panairi, i pranishëm ishte edhe ministri i Turizmit Blendi Klosi, i cili tha se bostani këtë vit ka arritur rekordin e eksporteve jashtë vendit duke kapur shifrën 81 mijë ton.
Festa është krejtësisht e veçantë, autoktone është një panair apo një konkurim i thjeshtë i prodhuesve të bostanit në këtë zonë si një nga produktet më tradicionale të zonës. Zona ka pasur një shitje rekord të këtij produkti kudo në Shqipëri, por edhe kanë eksportuar në botë. Mbase dhe kjo është e bukura e këtij sezoni që shumë bostanë është eksportuar në Suedi dhe shumë suedezë kanë ardhur në Divjakë për të kaluar pushimet.
Një festë e tillë sipas Klosit bëhet më synim nxitjen e zhvillimit të agroturizmit në zonë.
Kjo është idea jonë e festave të sezonit, festa të cilat nuk janë vetëm për të krijuar një atmosferë më të mirë për turistët që frekuentojnë plazhet tona, por më shumë se kaq duam që prodhimi vendas të promovohet, duam që tregtarët të shesin më shumë produktet e tyre dhe ajo çfarë ne kemi thënë, agrobiznesi, agroturizmi të jetë pjesë e zhvillimit të këtij sezoni.
Kreu i turizmit gjithashtu ndoqi itinerarin më të ri turistik në zonën e Divjakës, shëtitjen me varka në lagunë, gjë që plotëson agjendën e turistëve të huaj që kërkojnë më shumë se turizmin e rërës.