Detaje të tjera janë zbardhur nga ngjarja e rëndë që ndodhi te Shkëmbi i Kavajës në Durrës, ku një baba mbajti peng për disa orë dy fëmijët e tij të mitur.
Policia ka njoftuar se pas disa orësh negociata u arrit që 40-vjeçari, Aleks Marku, të dorëzohej. Gjithashtu bëhet e ditur se gjatë gjithë kohës RENEA punoi për t’a bindur që ai të mos qëllonte më.
Ndërkohë, dramatike ishte dhe fakti se gjatë negociatave mes RENEA-s dhe 40-vjeçarit, dëgjoheshin fëmijët që qanin dhe i luteshin babait të tij që të dorëzohej te autoritetet.
Sakaq, kur Maku ka pranuar të hapë derën rreth orës 07:00 dhe të shoqërohet nga policia, në gjendje të rënduar psikologjike ka dëshmuar se qëllonte nga dritarja se priste se do ta sulmonin disa persona, por pa treguar se kush. “Kisha frikë se do të më sulmonin disa persona.”, mësohet të ketë thënë 40-vjeçari.
Ai mësohet se ka qëlluar mbi 15 herë nga dritarja e ballkonit, ndërsa shenjat e plumbave ishin të dukshme në shtëpinë që ai kishte marrë me qira.
