Kolegji i Posaçëm i Apelimit (shkalla e dytë e procesit të vettingut) ka thirrur të mërkurën e javës që po vjen, datën 16 maj ora 10:00, ish Prokurorin e Përgjithshëm Adriatik Llalla për të nisur procesin administrativ ndaj tij për të kaluar në filtrin e kontrollit të pasurisë, figurës dhe atë profesional. Shqyrtimi çështjes ndaj tij do të zhvillohet në një seancë gjyqësore publike në ambientet e Pallatit të Kongreseve.
Procesi Administrativ
Trupi Gjykues, përbëhet nga gjyqtarët, Sokol Çomo si kryesues i Trupit Gjykues, Luan Daci si Relator i Çështjes dhe anëtarët: Albana Shtylla, Ardian Hajdari dhe Ina Rama. Seanca e apelimit vjen pasi Kolegji i Posaçëm ka marrë në shqyrtim çështjen e dorëzuar nga Komisioneri Publik, ku kërkohet që ish-Prokurori i Përgjithshëm, Adriatik Llalla t’i nënshtrohet vettingut.
Ky proces ndaj Adriatik Llallës u ndërpre nga Komisioni i Pavarur i Kualifikimit pas dorëheqjes së ish-kryeprokurorit nga e drejta për t’u emëruar gjyqtar apeli dhe rrjedhimisht nga i gjithë sistemi i drejtësisë. Verdikti u mor në atë kohë nga trupi gjykues i KPK (shkalla e parë e vettingut) me kryesues Roland Ilia dhe anëtarët Pamela Qirko dhe Olsi Komçi.
Shtegu për dorëheqje në çdo kohë, që do të thotë shpëtim nga vettingu u hap pikërisht nga Gjykata Kushtetuese gjatë interpretimit të ligjit të rivlerësimit. Dosjet e të dorëhequrve dhe të të papërshtatshmëve arkivohen, por nëse kërkohen nga prokuroria, atëherë ata i nënshtrohen edhe kontrollit penal.
Procesi penal
Largimi i Llallës nga drejtësia solli menjëherë reagimin e ambasadorit amerikan Donald Lu. Diplomati amerikan kujtonte se askush nuk mund t’i shpëtonte drejtësisë. Nuk vonoi shumë dhe kundër tij filluan hetimet zyrtare për katër akuza nga Prokuroria e Durrësit. Pak javë më parë dosja e tij me nr 447 i kaloi për kopetencë Prokurorisë së Krimeve të Rënda dhe prokurori i kësaj çështje është caktuar Klodian Braho.
Burimet mediatike thanë se Prokuroria e Krimeve të rënda ka bërë gati kërkesën drejtuar gjykatës së Krimeve të Rënda për vlerësimin e masës së arrestit ndaj Adriatik Llallës. Me këto dy çështje, njëra administrative në Kolegjin e Posaçëm të Apelimit dhe tjetra penale, në Prokurorinë e Krimeve të Rënda, kjo javë e re konsiderohet vendimtare për fatin e mëtejshëm juridik të Adriatik Llallës i konsideruar si një ndër “peshqit e mëdhenj” që pritet të bien në rrjetën e drejtësisë së re.
Përgatiti: Alpenews.al
