Kandidati për deputet i PD-ASHM në zgjedhjet parlamentare të 11 majit, në qarkun e Durrësit, Aulon Kalaja, ankimoi vendimin e Prokurorisë së Posaçme Antikorrupsion për mosfillimin e hetimeve, sa i përket kallëzimit të tij lidhur me vendimin e qeverisë për të falur gjobat përpara zgjedhjeve.
Kalaja u paraqit në Gjykatën e Posaçme Antikorrupsion teksa ankimi i tij pritet të regjistrohet në GJKKO, ku më pas do hidhet shorti elektronik, për të caktuar edhe gjyqtarin që do shqyrtojë kërkesën e tij.
Kalaja depozitoi kallëzim në SPAK më 27 maj të këtij viti, pasi sipas tij vendimi i qeverisë ndikoi në mënyrë të drejtëpërdrejtë në zgjedhje.
Vendimi i qeverisë parashikonte shfuqizimin e të gjitha masave administrative të paekzekutuara që janë vendosur gjatë periudhës 1 janar 2015, deri më 30 nëntor 2024.
