Alfred Peza
Faleminderit mjekëve, infermierëve, sanitarëve dhe gjithë personelit të sistemit të shëndetësisë që jeni sot në vijën e parë të luftës kundër Covid-19. Kurrë nuk ju kishim përfytyruar në formën e engjëjve mbrojtës, siç ju shohim që të jeni të gjithë Ju sot.
Faleminderit policëve, ushtarëve, punonjësve të emergjencave civile dhe rezervave të shtetit, që po përballoni një luftë që nuk ua mësoi askush, përveçse nevoja e familjeve tona që janë edhe tuajat.
Faleminderit reporterëve të terrenit, kameramanëve, shoferëve dhe kujtdo tjetër që punon në mediave jashtë studiove me ndriçim të ftohtë dhe shkëlqim të rremë. Pa ju sot televizionet do ishin disa kafazë bosh e pa vlerë.
Faleminderit vullnetarëve, bamirësve të vërtetë e të heshtur, punonjësve të qendrave sociale dhe azileve, që po tregoni se jeni pasaardhësit e Nënë Terezës.
Faleminderit punonjësve të furrave të bukës, marketeve, farmacive dhe tregjeve që po mbani gjall frymën dhe shpresën se kjo nuk është një luftë sa për mbijetesë, por për të ardhmen.
Faleminderit që po kompensoni edhe atë pjesë të kusureve tona kur na kërkohet që thjeshtë të rrijmë në shtëpi. Disa prej nesh vetëm pasi të mbarojë kjo luftë do ta kuptojë se “budallai mbaron ku fillon heroi”.
Ju jeni heronjtë e vërtetë të një Shqipërie heroike. Shqiptarët po tregojnë një anë të cilën rrallëherë ia kanë vendosur vetes në provë si sot: DURIMIN.
Sepse siç thoshte Giacomo Leopardi; “Durimi është virtyti më heroik, pikërisht se nuk ngjan aspak heroik”.
FALEMINDERIT.