Monedha e përbashkët evropiane e nisi edhe këtë javë e zhvlerësuar përkundrejt monedhës vendase, edhe pse me një rënie të lehtë. Sipas kursit zyrtar të Bankës së Shqipërisë, një euro këmbehet sot me 127.24 lekë, duke shënuar ditën e shtatë radhazi më rënie.
Faktori kryesor vijon të mbetet oferta e lartë për euro, sidomos ajo informate, që sipas ekspertëve të tregut, po kanalizohet përmes ndërtimeve.
Ekspertët e bankave pohojnë se ndikim ka dhe procesi i deeuroizimit, të nisur nga banka e Shqipërisë, por që nuk është thelbësor.
Në të njëjtën linjë ishte dhe guvernatori i Bankës së Shqipërisë i cili javën e kaluar tha se nuk ka ndikim deeuroizimi në rënien e euros, por faktorët fondamentale, që lidhen me investimet, remitancat, turizmin. “Në nivel makro, e thashë që mbiçmimi i kursit të këmbimit tregon rritje të fuqisë blerëse, për sa kohë që përcaktohet nga faktorë fondamentalë”, tha Gent Sejko.
Një tjetër faktor që po ndikon së fundi sipas aktorëve kryesor të tregut të këmbimit valutor janë edhe flukset e turistëve.
Tendenca rënëse e euros pritet të vijojë gjatë gjithë verës. Ekspertët e tregut argumentojnë se kjo do të jetë tendenca e euros duke qenë ecuria do të ndikohet edhe prej efekteve sezonale.
Ndërsa dollari amerikan, ditën e sotme ka fituar pikë ndaj lekut, pasi ra në nivelet më të ulëta të pesë viteve. Një dollar u këmbye sot me 106.63 lekë, rreth 0.27 pikë më shumë se sa mbylli javën e kaluar. Monedha e gjelbër fitoi pikë ndaj euro në tregjet ndërkombëtare dhe kjo është reflektuar edhe në tregun vendas. Sipas kursit të këmbimit të Financial Times, një euro po këmbehet me 1.19 USD. Në shkurt, euro po luhatej në nivelet më të larta të tri viteve të fundit, ku këmbehej me 1.25 USD.
Një rritje të lehtë ka pësuar edhe paundi britanik. Monedha britanike u këmbye sot me 144.27 lekë, me një rritje prej 0.13 pikë në krahasim me të premten.
