Doktori i Shkencave, Erand Llanaj tha gjatë një interviste për emisionin “Abc-ja e mëngjesit” se vaksinimi është një ndër masat që duhen marrë për të përballuar pandeminë. Epidemiologu argumentoi se duke pasur parasysh dhe efektivitetin e vaksinës ndaj varianteve të reja, janë të nevojshme dhe masat e tjera.
“Kur vjen puna tek masat që duhen marrë, vaksina nuk është plumbi i artë por një ndër masat që duhet të marrim, është diçka që ka krijuar këtë entuziazëm që kjo do të përfundojë. Është keqpërdorur nga ekspertë koncepti i imunitetit të tufës. Në bazë të formulës duhet që minimumi të vaksinohen 67 përqind e popullatës.
Në variantin Delta, duke qenë se ka prirje për evazion të imunitetit, qoftë nga vaksina apo nga ata që e kanë kaluar infeksionin rritet me 0.5 përqind, gjë që e shtyn kufirin e imunitetit të tufës. Kur shifra e imunizimit lëviz në këtë nivel, një mbulesë vaksinore 60 përqind është e pamjaftueshme për të hequr të gjitha masat.”, tha Llanaj.
Përsa i përket dozës së tretë të vaksinës, ai tha se duhet të bëhet për kategoritë e rrezikuara. “Në parim jam për dozat e treta për disa kategori specifike, mbi 65 vjeç me imunitet të kompromentuar, ata me sëmundje të rënda si kanceri, sëmundje kronike të veshkave, por për grupmoshat e tjera, nuk jam pro. Është dhe një argument etik ku shumica e vendeve të botës, i bie që një pjesë e tyre konsiderohen me të ardhura të mesme dhe të larta kanë marrë nga dy “gota” ndërkohë që shumë vende të tjera asnjë gllënjkë.“, tha ai.