Një shofer i linjës së transportit ndërkombëtar Sarandë – Athinë është dënuar me 3 vjet e 4 muaj burg, pasi është kapur një vit më parë me rreth 3.4 gram kokainë në pikën e kalimit kufitar Qafë-Botë. Vendimi është dhënë nga Gjykata e Sarandës për 52-vjeçarin Vasillaq Vasili, i cili ndodhet në paraburgim prej 18 nëntorit 2024.
Rreth orës 19:00 të asaj dite, sipas dosjes hetimore, punonjësit e policisë kanë konstatuar një shtetas, i cili sapo kishte hyrë në territorin e Republikës së Shqipërisë nëpërmjet pikës doganore Qafë-Botë, së bashku me mjetin që drejtonte, tip furgon “Mercedes Benz”.
Teksa është bërë kontrolli i mjetit së bashku me personin, janë gjetur një çantë tip marsup, të cilën e kishte me vete, 6 mbështjellje në formë doze me plastmas, brenda të cilave kishte material pluhuri me ngjyrë të bardhë si ajo e lëndës narkotike e llojit “kokainë”, si dhe një peshore elektronike, me mbishkrimin. Më pas, është ushtruar kontroll në banesën e këtij shtetasi, ku nuk i janë gjetur sende të jashtëligjshme. Pas peshimit të lëndëve të dyshuara si narkotike, ato rezultuan me peshë totale (së bashku me ambalazh) 3.83 gramë kokainë.
