Vijon operacioni “Fake Star 5” kundër falsifikimit të markave të njohura. Dy persona të shpallur në kërkim, mes tyre një shtetas turk, janë arrestuar nga policia në Tiranë.
Turku 46-vjeçar, Ozkan Sulun, dyshohet se kishte rolin kryesor në stampimin e logove false në veshje të kontrabanduara. Ai u kap së bashku me 21-vjeçarin Lindion Haka, që ishte bashkëadministrues i një prej magazinave ku kryhej ky aktivitet.
Të dy akuzohen për magazinimin dhe falsifikimin e veshjeve në fshatin Brrar. Dje, në kuadër të të njëjtit operacion, u arrestuan katër persona të tjerë dhe u proceduan në gjendje të lirë edhe katër të tjerë.
Materialet për rastin janë dërguar në Prokurorinë e Tiranës për hetime të mëtejshme.
Njoftimi:
Vijon operacioni policor i koduar “Fake Star 5”. Lokalizohen dhe kapen të 2 shtetasit e shpallur në kërkim, Ozkan Sulun dhe Lindion Haka.
Njëri prej tyre, shtetas turk që koordinonte procesin e stampimit me logo false të veshjeve të kontrabanduara.
I ndaluari tjetër, bashkadministrator i njërës prej magazinave ku kryhej procesi.
Dje, gjatë operacionit, u vunë në pranga 4 shtetas dhe u proceduan në gjendje të lirë 4 të tjerë.
Si rezultat i kontrolleve të kryera me mbështetjen e inteligjencës policore, në vijim të operacionit “Fake Star 5”, Sektori për Hetimin e Krimit Ekonomik dhe Financiar, në bashkëpunim me komisariatet e Policisë Nr. 3 dhe Nr. 4, lokalizuan, kapën dhe vunë në pranga shtetasin turk O. S., 46 vjeç, si dhe shtetasin L. H., 21 vjeç.
Ata ishin shpallur në kërkim në kuadër të operacionit “Fake Star 5”, sepse dyshohet se janë përfshirë në veprimtaritë kriminale të magazinimit në 2 ambiente në fshatin Brrar, të veshjeve të kontrabanduara, të cilave iu stampoheshin logo false të markave të njohura ndërkombëtare.
Materialet procedurale iu referuan Prokurorisë së Tiranës, për veprime të mëtejshme.
