EMRAT/ Të akuzuar për korrupsion në zgjedhjet parlamentare të 2021, SPAK dërgon për gjykim 4 persona

29 July, 2025 s.autor Aktualitet, Kronikë

Prokuroria e Posaçme ka përfunduar hetimet dhe ka çuar për gjykim çështjen penale ndaj 4 të pandehurve, të akuzuar për përfshirje në korrupsion zgjedhor gjatë zgjedhjeve parlamentare të 25 prillit 2021. Sipas njoftimit të SPAK, Ndrekë Lera dhe Ilir Sokoli akuzohen për “korrupsion aktiv në zgjedhje”, ndërsa Ndoc Guri dhe Arben Kolaj për “korrupsion pasiv në zgjedhje”.

Gjjithashtu SPAK shton se këta persona janë përfshirë në një skemë të organizuar blerjeje votash, duke ofruar rreth 5 mijë lekë për votë, në favor të një subjekti politik. Sipas njoftimit, kjo është bërë ose përmes dhënies së parave direkt, ose nëpërmjet ndërmjetësve që ndikonin te votues të tjerë.

NJOFTIMI I SPAK:

Prokuroria e Posaçme kundër Korrupsionit dhe Krimit të Organizuar (Prokuroria e Posaçme), ka përfunduar hetimet paraprake dhe ka paraqitur para Gjykatës së Posaçme të Shkallës së Parë për Korrupsionin dhe Krimin e Organizuar kërkesën për dërgimin e çështjes për gjykim, të procedimit penal nr.117 të vitit 2021 me marrëveshje fajësie në ngarkim të katër të pandehurve, të akuzuar për veprat penale si më poshtë:

Nga analiza e provave të grumbulluara në kuadër të këtij hetimi rezulton se gjatë zgjedhjeve parlamentare të datës 25 prill 2021, është konstatuar një skemë e qartë e korrupsionit zgjedhor, e cila përfshinte ofrimin e shpërblimeve monetare në këmbim të votës.

Skema korruptive konsiston në një model të organizuar të blerjes së votës, ku individë të lidhur me një forcë politike kanë ofruar shuma të caktuara parash (rreth 5 000 lekë për votë) për qytetarë të ndryshëm, me qëllim sigurimin e mbështetjes elektorale. Kjo është realizuar ose përmes dhënies së drejtpërdrejtë të parave për votën e vet, ose përmes angazhimit të personave të tretë për të ndikuar te zgjedhës të tjerë.

Gjatë hetimeve, janë përdorur mjete të posaçme të hetimit, përfshirë përgjime telefonike, të cilat kanë evidentuar se shtetasi Ndrekë Lera ka pasur një rol qendror në këtë aktivitet kriminal, duke u përfshirë drejtpërdrejt në biseda që lidhen me premtimin dhe organizimin e pagesave për vota në favor të një subjekti politik.

Për sa më lart, nga tërësia e hetimeve të kryera, bazuar në provat e marra gjatë hetimeve paraprake, transkriptimeve të përgjimeve telefonike, deklarimet e shtetasve të dyshuar si dhe pas studimit të dokumentacionit të administruar, rezulton se shtetasit Ndreke Lera dhe Ilir Sokoli, me veprimet e tyre, kane konsumuar elementë të veprës penale penale “Korrupsion aktiv në zgjedhje” e kryer në bashkëpunim, parashikuar nga neni 328 dhe 25 i Kodit Penal. Gjithashtu të pandehurit Ndoc Guri dhe Arben Kolaj kanë konsumuar elementet e veprës penale “Korrupsoni pasiv në zgjedhje” parashikuar nga neni 328/b i Kodit Penal.