Prestigjozja britanike Daily Mail ka zbuluar se agjentët shqiptarë të shërbimit sekret informativ, të financuar nga Britania e Madhe, u kanë shitur informacione një grupi kriminal.
Mësohet se këto informacione kanë çuar në vrasjen e një burri si pjesë e një “lufte” midis bosëve rivalë të drogës në vendin ballkanik, ka zbuluar një hetim i Mail.
Një burim tha se të paktën dy agjentë të tjerë të ekipit “Merlin” kanë shitur informacion të klasifikuar në rrjetet e krimit që ata synonin të godisnin.
Zbulimet tronditëse vijnë pasi kryeministri Rishi Sunak muajin e kaluar u zotua të shpenzojë më shumë për të luftuar emigrimin e paligjshëm dhe krimin e organizuar nga Shqipëria.
Ekipi “Merlin” u krijua brenda shërbimit sekret të Shqipërisë, i njohur si SHISH, në vitin 2000, kur bandat nga vendi ballkanik filluan të vepronin për herë të parë në Britaninë e Madhe.
Që në fillim kjo njësi mori pjesën më të madhe të financimit të saj nga taksapaguesit britanikë.
U qëllua me armë: Anëtari i familjes së krimit të klanit Kastrati, Denis Kasaj, u vra nga breshri i plumbave të qëlluar në Mercedesin e tij nga një automatik çek Skorpion
Makina e arratisjes e djegur pas vrasjes së anëtarit të klanit Kastrati, Denis Kasaj
Mitralozi çek Skorpion i përdorur në vrasjen brutale të Denis Kasajt
Agjentët e saj u trajnuan nga Britania e Madhe dhe aktiviteti i departamentit monitorohet nga një oficer me bazë në ambasadën britanike në Tiranë i lidhur me inteligjencën në Londër.
Ekipi “Merlin” ishte aq i fshehtë, saqë edhe ekzistenca e tij mbeti e paraportuar për 16 vjet, deri në vrasjen e Denis Kasajt, anëtar i familjes së krimit të klanit Kastrati, i cili u qëllua në një Mercedes nga një breshëri plumbash të dala nga një automatik çek “Skorpion”.
Vrasësi me pagesë Ilir Memushaj u dënua me 14 vjet burg në vitin 2017 për vrasjen për të cilën detektivët zbuluan se ishte kryer me kërkesë të një klani rival kriminal, Binjaku, si pjesë e një grindjeje të gjatë mes familjeve.
Të dy klanet kanë krijuar rrjete të mëdha droge në të gjithë Evropën, duke përfshirë Britaninë e Madhe.
Blackberry i personit të armatosur kishte 12 fotografi të thirrjeve telefonike të transkriptuara të shënuara ‘sekret’, të marra nga një agjent i ekipit “Merlin” përmes operacioneve të përgjimit.
Vrasësi Ilir Memushaj në gjykatë gjatë gjyqit të tij në 2017 para se të dënohej me 14 vjet burg për vrasje
Gjatë këtyre telefonatave, gangsterët zbuluan detaje të Mercedesit, pasagjerëve të tij dhe saktësisht se ku do të ishte në momentin e të shtënave.
Një agjent i “Merlinit” në terren, më vonë doli në gjyq i akuzuar se ishte agjent i dyfishtë dhe se u shiste sekrete shtetërore kriminelëve.
Ai u lirua pasi gjykatësi vendosi se nuk mund të provohej se ai kishte nxjerrë informacionin e inteligjencës, pasi agjentë të tjerë të Merlin kishin akses në të njëjtin informacion.
Por gjykatësi zbuloi se informacioni i marrë nga klani Binjaku kishte ardhur nga një agjent në shërbim të ekipit “Merlin”.
Në aktgjykim thuhej: “Është vërtetuar se të dhënat e marra nga pajisja Blackberry… janë të njëjta me ato të përpiluara nga organet e ndjekjes penale për transkriptimin e bisedave telefonike që rezultojnë nga përgjimet”.
Denoncuesi, i cili punon për SHISH, përmendi dy agjentë të tjerë që punonin për ekipin “Merlin”, por që atëherë janë zhvendosur ose pushuar nga puna për shkak të dyshimeve se ata kishin nxjerrë informacione.
“Informacionet nga departamenti i tyre u shiteshin kriminelëve, përgjimet e paligjshme telefonike u bënë pa miratimin e prokurorëve, me informacionin e marrë në USB flash drives ose si foto,” tha denoncuesi.
“Mendoj se informacionet ende rrjedhin. Nëse kjo nuk do të ndodhte, ne mund të shihnim më shumë organizata kriminale të shpërbëra dhe më shumë pasuri të sekuestruara”, shtoi ai.
Pavarësisht kësaj, financimi nga taksapaguesit britanikë vazhdon dhe “pa atë mbështetje ‘Merlin’ nuk mund të ekzistonte sot”.
Denoncuesi tha se puna për Merlin është një ‘punë ëndrrash’ për agjentët shqiptarë për shkak të aksesit të saj të pakrahasueshëm në informacion dhe financimit e mbështetjes së gjerë të ofruar nga MB.
“Ka një pagë të mirë në krahasim me departamentet e tjera dhe makinat e reja, duke përfshirë “Audit”, të cilat u zgjodhën nga kreu i Merlin, me faturat e paguara nga ambasada britanike”, shtoi ai.
Agjencia ka një drejtor dhe katër inspektorë që punojnë me agjentë të tjerë të SHISH-it kur kanë nevojë për mbështetje për një hetim.
Një tjetër ish-oficer i SHISH tha: Drejtoria Merlin ka qenë nën kujdesin e vazhdueshëm të Ambasadës së Mbretërisë së Bashkuar në Tiranë.
“Në një rast kur drejtori i Shish-it donte të zëvendësonte drejtorin e Merlin-it, ambasadori i Mbretërisë së Bashkuar erdhi disa herë në selinë e SHISH-it, duke kundërshtuar vendimin. Ai nuk u zëvendësua”, shtoi ai.
Ai theksoi se oficerët e tjerë të ekipit “Merlin” ishin punëtorë e të ndershëm dhe kishin kryer operacione të suksesshme veçanërisht kundër trafikut të drogës.
Një zëdhënës i Shish tha se agjencia po përgatiste një përgjigje ndaj këtyre akuzave dhe më pas nuk bëri komente të mëtejshme.
