Një 23-vjeçar shqiptar i punësuar në Athinë është ekzekutuar nga tre bashkëkombës të tjerë. Sipas policisë greke, bëhet fjalë për Mihal Kapuranin nga qyteti i Korçës.
Ngjarja e rëndë ndodhi mbrëmjen e djeshme në sheshin e lagjes “Exarchia” të kryeqytetit të Greqisë, Athinë.
Sipas burimeve policore, i riu shqiptar u konfliktua me 3 shqiptarë të tjerë për motive ende të panjohura dhe më pas u sulmua nga ata fizikisht.
Sherri nisi fillimisht verbalisht e më pas u pasua nga disa goditje me levë e më pas me thikë drejt e në trupin e 23-vjeçarit.
Megjithëse transportimi i tij për në spital ishte i menjëhershëm, mjekët nuk mundën ta shpëtonin të riun.
Banorët e zonës e njihnin viktimën si person të qetë e pa probleme.
Autoritetet thanë se kanë identifikuar emrat e ekzekutorëve.
Bëhet fjalë për një shtetas me origjinë nga Përmeti, banor i Athinës, si dhe dy shtetas të tjerë shqiptarë me banim në Shqipëri, të cilët kanë hyrë në kufirin grek pak ditë më parë.
Identitetet e të dyshuarve u janë dërguar pikave kufitare me Shqipërinë si dhe Policisë shqiptare.
Ndërkohë vijojnë hetimet për zbardhjen e shkaqeve të vrasjes.
