Policia e Elbasanit ka lënë të lirë të gjithë personat e shoqëruar një ditë më parë pas vrasjes së Pjerin Xhuvanit në këtë qytet dhe plagosjes së 4 personave të tjerë.
Në qeli po mbahet vetëm ish-efektivi i forcave RENEA, Arbër Paplekaj që u vetëdorëzua pas ngjarjes dhe që ka deklaruar se qëlloi për vetëmbrojtje.
Mësohet se grupi hetimor ka marrë dëshmitë e personave të shoqëruar në përpjekje për të zbardhur dinamikën e ngjarjes.
Hetuesit kanë sekuestruar edhe kamerat e sigurisë pranë vendit ku ndodhi vrasja. Në vendngjarje janë sekuestruar rreth 15 gëzhoja, por ende nuk është përcaktuar nëse ato janë qëlluar nga 1 apo më shumë armë.
