Andrew Bode, 44 vjeç, me origjinë nga Berati, dyshohet të jetë ekzekutori i Edmond Papës në 16 dhjetor 2022 në zonën e Selitës në Tiranë. Mëngjesin e sotëm është arrestuar nga një operacion i zhvilluar nga forcat Renea dhe policia e Gjirokastrës. Arrestohet edhe Julian Kalemi i cili kishte strehuar në banesë Andrew Boden.
Kush është Andrew Bode?
44-vjeçari njihet edhe si Edvin Bode, emër të cilin e ka ndërruar disa vite më parë. Bode është biznesmen në qytetin e Korçës pasi ka në pronësi një kompani që merret me import dhe eksport, tregtim me shumicë dhe me pakicë të ujit të pijshëm, depozitimin dhe transportin e ujit të pijshëm dhe pijeve të tjera joalkoolike.
Bode ishte i dyshuari kryesor si ekzekutor i Papës, e provuar sipas saj nga pamjet filmike dhe qelizat telefonike që e kanë konstatuar prezencën e tij pranë vendit të ngjarjes në kohën kur është kryer vrasja. 44-vjeçari rezulton me precedent penal për drogë, por i pa dënuar me vendim të formës së prerë. 44-vjeçari u pajis me pasaportë të re vetëm 1 ditë përpara se të shpallej në kërkim. Ai ka aplikuar për pasaportë në vendin e lindjes së tij, në Berat më 29 Dhjetor, 13 ditë pas vrasjes që kreu në zonën e Selitës.
Në këtë ngjarje, Bode dyshohet është ndihmuar nga Albano Velo. Albano Velo u arrestua më 1 janar 2023 në Rinas, si porositës i vrasjes së Edmond Papës, por ai mohon përfshirjen në ngjarje.
Viktima vëzhgohej prej kohësh nga autori, ndërsa qëndronte në banesën e vëllait dhe në momentin kur ai është ulur në lokalin e këtij të fundit, autorët i kanë zënë pritë duke e qëlluar me 9 plumba.Shkak për ngjarjen duket se është e shkuara e errët e Papës. Dyshohet që 49-vjeçari ka pasur konflikte të mëparshme në fushën e narkotikëve për pazare droge. Në momentet që është afruar në ambientet e jashtme të lokalit Papa ka reaguar dhe ka qëlluar në drejtim të tij me mjetet që ka pasur përpara, tavëll duhani dhe të tjera. Në këtë moment një nga autorët ka qëlluar me plumba pistolete 9 herë dhe menjëherë është larguar nga vendi i ngjarjes. Edmond Papa ishte me precedent në Greqi, i dënuar për trafik droge si dhe i skeduar më parë në Britani të Madhe. Sipas burimeve, ai kishte pak kohë që kishte ardhur në Shqipëri ndërsa në Tiranë ndodhej për të shoqëruar nënën për disa vizita mjekësore. Viktima ishte pronar i hotel ‘Blue Sky’ në Sarandë.
