Shqiptari Adriatik Tresa, i cili në 6 dhjetor 2020, do të mbushte 40-vjeç, u ekzekutua dje në Ekuador, ndërsa dyshohet se vrasja ka lidhje me trafikun e drogës.
Në Shqipëri, Tresa nuk disponon asnjë biznes dhe nuk rezulton të jetë skeduar ndonjëherë nga policia Shqiptare. Ndërsa në Ekuador, ai dyshohet se vepronte si vrasës me pagesë dhe pjesë e një grupi kriminal Shqiptar,që trafikon kokainë nga Amerika Latine drejt vendeve të Bashkimit Europian.
40-vjeçari Shqiptar, dyshohet nga policia ekuadoriane se është njeriu që në vitin 2017, ka vrarë në Guayakuil, shqiptarin Ilir Hidri nga Vlora. Për këtë ngjarje ai është hetuar, por për shkak të munges së provave nuk ka pasur një mandate arresti për të.
Ekzekutimi i Ilir Hidrit, ka qënë vrasja e parë, që shënon dhe zanafillën e ekzekutimeve mafioze mes trafikantëve shqiptarë që qëndrojnë në Ekuador. Në vitin 2017 janë vrarë Ilir Hidri nga Vora, një vit më vonë u ekzekutua Adriatik Llagji nga Borshi dhe Fadil Kaçaniqi.
Po në vitin 2018 një tjetër shqiptar që lëvizte me makinë të blinduar, iu bë atentat po në qytetin e Guayaquil. Ndërkohë Tresa, gjatë kësaj kohe jetonte pikërisht në këtë vilën dykatëshe, e rrethuar me kamera sigurie, shtëpie e cila ndodhet brenda një kompleksi rezidencial banimi në Guayakil, ku jetojnë dhe disa Shqiptarë të tjerë, nga Fieri, Vlora, Elbasani dhe Dibra. Gjatë periudhës së qëndrimit në Ekuador, Tresa është martuar me një vajzë vendase, dhe me sa duket kjo e ka ndihmuar, që ai të marë dhe shtetësinë ekuadoriane.
Shqiptari dispononte dy shtetësi dhe se për t’iu shmangur kontrolleve policore, ai gjatë viteve 2011 deri në vitin 2013, ka mbajtur një kartë anëtarësimi të Organizatës Botërore për të Drejtat e Njeriut, duke u prezantuar si “aktivist ndërkombëtar”.