Gëzim Toma është i arratisuri nga burgu i Drenovës, i dënuar me 20 vite burg për vrasje, grabitje dhe arrati nga vendi i dënimit.
Kur u bënë 6 vite pas arratisjes së tij, Toma është ekstraduar nga vendi fqinj dhe është dërguar në një burg të sigurisë së lartë ku do të vuajë dënimin.
Gëzim Toma ka qenë duke vuajtur dënimin në burgun e Drenovës për veprën penale “Vrasja me dashje” kryer në bashkëpunim, si autor i vrasjes së një 25-vjeçari, ngjarje e ndodhur në Krastë, Martanesh. Ai u arrestua në fshatin Elaptora, pranë Kosturit në Greqi, teksa përpiqej t’i shpëtonte gjurmimit nga forcat e rendit.
Kujtojmë që më 29 nëntor të vitit 2013, 7 persona u arratisën nga Burgu i Sigurisë së Lartë të Drenovës. Të arratisurit e asaj ngjarjeje që bëri bujë në vendin tonë ishin: Admir Tafili, lindur e banues në Shkodër; Fran Marashi, lindur e banues në Shkodër; Gëzim Guri, lindur e banues në Vaun e Dejës, Shkodër; Gëzim Toma, lindur e Banues në Dibër; Reiz Haxhiraj, lindur e banues në Selenicë të Vlorës; Artur Gora, lindur e banues në Pojan të Korçës si dhe Eduard Lula, lindur e banues në Përmet.
Uniformat blu në bashkëpunim me forcat speciale të RENEA-s disa orë pas arratisjes së bujshme bënë të mundur arrestim në një magazinë të braktisur në Përrenjas të Admir Tafilit, Fran Marashit dhe Gëzim Guri.
Këta kanë ndihmuar të arratisurit të fusnin armë në ambientet e burgut dhe më pas t’i ndihmonin me automjetet e tyre për t’i larguar. Të ndaluarit, pasi janë pajisur me armë dhe nën kërcënimin e tyre, kanë mbyllur në banjë punonjësit e burgut dhe pasi kanë dalë nga ambientet e burgut janë ndarë.
Tafili Guri dhe Marashi ikën në drejtim të Përrenjasit, ndërsa Reiz Haxhiraj, Edmond Lulo dhe Gëzim Toma arritën të kalonin kufirin dhe shkuan në Greqi, ku pas shkëmbimit të informacioneve mes palës shqiptare dhe homologëve grekë, u bë i mundur arrestimi i tyre katër ditë pas arratisjes.
I dënuari Artur Gora u arrestua pak orë pas arratisjes në Korçë, teksa udhëtonte me një taksi drejt fshatit Pojan, ku banon familja e tij. Kujtojmë se në korrik të vitit që sapo lamë pas u ekstradua nga Greqia për këtë ngjarje Eduart Lulo.
