Partia Socialiste do të mbledhë një nga forumet e saj kryesore, ndoshta për herë të fundit për 2019, nën drejtimin e Kryetarit të saj Edi Rama.
Të martën më 24 dhjetor, ora 09.00 në selinë qëndrore të kësaj partie në Tiranë, pritet të diskutohen disa nga zhvillimet më të rëndësishme të fundvitit.
Situata politike në vend pas tërmetit shkatërrimtar të 26 nëntorit, mund të jetë një nga pikat e diskutimit.
Gjatë javëve të fundit në gjithë vendin janë mbledhuar Asambletë socialiste, në përfundim të të cilave janë administruar kandidaturat për Kryetar të PS, në të 61 bashkitë e Shqipërisë. Raporti rreth këtij procesi, pritet të jetë edhe një nga pikat kryesore të raportimeve dhe diskutimeve të mbledhjes së forumit të lartë socialist.
Përgatitjet për Kogresin e Partisë Socialiste, që pritet të mbahet në fund të shkurtit të vitit që po vjen, mund të jetë një tjetër pikë e diskutimeve në Kryesi. Sikundër edhe një analizë e zhvillimeve kryesore politike të 2019 dhe sfidat e reja për socialistët gjatë 2020, nuk përjashtohet që të zerë vend në këtë takim.
Kjo mbledhje e Kryesisë së PS, mund të jetë e fundit për këtë vit kalendarik, ndaj edhe interesi i medias mund të jetë i përligjur, po të kemi parasysh se ajo pritet që të drejtohet nga Kryeministri Edi Rama.
Alpenews.al
