Në verë u diskutua se Gazmend Paja mund të ishte një prej aktorëve që u largua nga “Portokallia”. Ai vetë nuk e mohoi duke u shprehur se “nuk i dihet çfarë ndodh”, por nëse nuk gjente një personazh të ri, do të bënte një pauzë.
Megjithatë, në nisje të sezonit të ri të “Portokallisë”, e pamë Gazmend Pajën përsëri si pjesë e spektaklit të humorit, i veshur me petkun e personazhit të Melamin Beratit apo personazhit të Nasit, të dy role të hershme të tij.
Sot, Gazmend Paja praktikisht e shmangu të folurit për “Portokallinë”.
I pyetur në “Jo vetëm modë” nëse i pëlqen më shumë karriera në film apo ajo në televizion, tek “Portokallia”, Paja u përgjigj:
“Të parën që përmende.”
Më tej, sqaroi se ndonëse televizioni të mëson shumë gjëra, veçanërisht lidhur me menaxhimin e kohës, nga ana tjetër të konsumon.
“Televizioni është një ndërmarrje e fuqishme që të organizon, por paralel ke edhe konsumin.”, u shpreh Paja.
Ai ishte në premierën e filmit “Yjet e së ardhmes”, ku luan krah Elia Zaharias dhe aktorëve më të shquar të kinemasë shqiptare, si: Margarita Xhepa, Tinka Kurti, Reshat Arbana, Ema Andrea, Sadush Ylli, Karafil Shena si edhe babai i tij, Luftar Paja.
