Ministri i Turizmit dhe Mjedisit Blendi Klosi i është bashkuar të rinjve të “Smile Albania” në pikën kufitare të Morinës për të mirëpritur së bashku me ta pushuesit që kalojnë në këtë pikë.
“Do të shkojmë në Malin e Robit dhe do të qëndrojmë 10 ditë”, i tha një pushues kosovar, ministrit Klosi pasi ky i fundit i uroi personalisht mirëseardhjen.
Në takimin me policët kosovarë, ministri Klosi u informua për rritjen e numrit të pushuesve gjatë këtij muaji dhe pritshmëritë më të mëdha të shtatorit.
Ministri Klosi siguroi se të gjitha strukturat do të jenë në gatishmëri edhe gjatë muajit shtator për të siguruar një sezon të suksesshëm turistik. “Ajo çfarë kemi kontaktuar me të gjthë turistët gjatë ditës së sotme është një dëshirë e tyre për të kaluar deri në mesin apo fundin e shtatorit pushimet në Velipojë Shëngjin, Durrës dhe më tej në zonën e jugut dhe për të gjitha këto ne do të vazhdojmë të mbajmë strukturat tona në gatishmëri që sezoni turistik edhe gjatë muajit shtator të jetë me të njëjtat parametra me sigurinë maksimale, pastërtinë maksimale dhe po ashtu me shërbime sa më të kontrolluara dhe cilësore për turistët kosovarë.”- tha ministri Klosi, duke garantuar se projekti “SmileAlbania” është në gatimshëri për të mirëpritur me buzëqeshje të gjithë pushuesit.