Një i ri ka humbur jetën mëngjesin e djeshëm në spitalin “Nënë Tereza”, në kryeqytet. Dyshimet janë se 31-vjeçari Vladimir S., banues në Tiranë, ka humbur jetën nga një infarkt që i ka shkaktuar overdoza e heroinës së marrë.
Vdekja e të riut është konstatuar nga mjekët e spitalit rreth orës 8:00 të së shtunës. Bluzat e bardha kanë lajmëruar shërbimet policore lidhur me rastin.
Burimet policore thanë se nga hetimet paraprake, rezultoi se vdekja e të riut ka ardhur “për shkaqe overdoze heroine që i ka shkaktuar infarkt kardiak”.
“Më datë 23.06.2018, në spitalin ‘Nënë Tereza’, ka vdekur shtetasi V. S., banues në Tiranë. Nga veprimet e kryera, rezultoi se vdekja ka ardhur nga përdorimi i lendeve narkotike, duke i shkaktuar infarkt kardiak. Materialet u referuan në Gjykatën e Shkallës Parë Tiranë”, njoftoi zyrtarisht Policia.
Në “Raportin Vjetor Global Të Drogave” për vitin 2017, publikuar në 23 qershor (publikim i zyrës për Drogën dhe Krimet e Kombeve të Bashkuara, UNODC) jepen të dhëna për Shqipërinë.
Sipas publikimit, të ndarë të pesë kapituj të zgjeruar, Shqipëria, si asnjëherë tjetër në raportet e mëparshme, përmendet në pothuajse të gjitha, si një nga vendet kyçe në trafikimin, prodhimin e barit të kanabisit, madje dhe përdorimin e substancave të forta psikotike nga të rinjtë.
