Italianët janë larguar nga Kabuli të premten në darkë. Dy fluturime u ulën në aeroportin e Fiumiciono-s. Në bordin e të dy avionëve ishin rreth 100 persona. Këta ishin avionët e fundit të Forcave Ajrore që fluturojnë drejt Italisë në funksion të përfundimit të evakuimeve nga Afganistani të ish-bashkëpunëtorëve afganë së bashku me familjet e tyre, gazetarë, personel diplomatik dhe ushtarak.
Mëngjesin e sotëm, rreth orës 08:00, një avion i tretë u ul me 58 afganët e fundit të evakuuar nga Kabuli.
Më tepër është një arratisje e dëshpëruar sesa një tërheqje e organizuar. Sulmet e së enjtes në aeroportin e Kabulit e përshpejtuan situatën dhe operacionet e evakuimit u mbyllën me nxitim.
Masakra në aeroportin e Kabulit u mori jetën 200 personave.
Mes viktimave, 13 ushtarë amerikanë dhe 187 civilë, duke përfshirë tre shtetas britanikë. Një kamikaz shpërtheu veten në turmën që po përpiqej prej disa ditësh të futej brenda aeroportit, me shpresën për të fluturuar jashtë vendit.
Mes viktimave të sulmit ishte edhe gazetari Alireza Ahmadi, një nga themeluesit dhe reporterët e agjencisë afgane të lajmeve Raha.
Në profilin e saj në rrjetin social Facebook, agjencia dha lajmin për vdekjen e tij. Sipas La Repubblica, Ahmadi duhej të largohej me fluturimin e fundit për në Romë.
