Mediat përtej Adriatikut shkruajnë se një emigrant shqiptar ka humbur jetën në Itali, si pasojë e infektimit nga Covid-19 në një moshë shumë të re.
Bëhet fjalë për 39-vjeçarin Pirin Lleshaj nga zona e Mirditës, i cili ka humbur jetën në mbrëmjen e 7 shkurtit, duke lënë dhimbje pas te të gjithë të afërmit e tij.
Zona ku ai ka ndërruar jetë, Molise, sipas autoriteteve nuk kishte regjistruar më herët asnjë viktimë nga pandemia nën moshën 40-vjeçare.
Emigranti shqiptar ka lënë pas partneren e tij 25-vjeçare dhe dy fëmijët e mitur. Sipas njoftimeve ai nuk kishte sëmundje të tjera, ndërkohë që pas infektimit me COVID ishte në gjendje kritike për disa ditë radhazi.
Pas këtij rasti dhe disa infektimeve të tjera të qytetareve në zonë, autoritetet presin konfirmimin e analizave, pasi dyshojnë se në zonë ka mbërritur varianti britanik i COVID, i cili besohet se është më tepër ngjitës, por edhe më agresiv në lidhje me pasojat që krijon në trupin e njeriut.
