Vetëm pak ditë më parë mbarë opinion shqiptar u trondit nga ngjarja e dhimbshme e 20-vjeçares, Anxhela Meçani, e cila pasi u rrah barbarisht nga disa persona të paidentifikuar u hodh në rrugë teksa makina ishte në lëvizje. Një qytetar e gjeti Anxhelën në mes të rrugës në Itali dhe telefonoi menjëherë policinë. Shqiptarja ishte dhunuar aq shumë saqë nuk iu mbijetoi dot plagëve të marra dhe humbi jetën në spital pa pasur askënd pranë.
Një i afërm i Anxhelës ka mohuar zërat se ajo ishte prostitutë dhe ka thënë se familja e saj e mësoi lajmin nga mediat dhe jo zyrtarisht.
“Nuk është e vërtetë që ishte prostitutë. Ka vdekur e vetme në spital, sepse asnjë nga familjarët e saj nuk është lajmëruar. Familjarët janë informuar nëpërmjet medias. Anxhela kishte humbur mamanë e saj në janar të këtij viti nga një infarkt miokardi. Vjen nga një familje shumë e varfër. Në muajin mars ka festuar 20 vjetorin. Djali me të cilin jetonte prej dy vjetësh i kishte premtuar martesë. Vdekja e dytë në atë familje është shkatërruese dhe më vjen keq që shqiptarët janë të parët për të gjykuar dhe për të nxjerrë vrer pa e ditur fare se çfarë ka ndodhur me të”, ka treguar një i afërm i Anxhelës.
