Policia e Kosovës ka njoftuar se dy parashutistë janë përplasur me njeri-tjetrin gjatë kohës së uljes, ku si pasojë e lëndimeve të marra një 27-vjeçar ka humbur jetën.
Në njoftimin e bërë nga Policia e Kosovës thuhet se aksidenti ka ndodhur ditën e diel, rreth orës 13:45, transmeton Telegrafi.
“Me datë 19.7.2020 rreth orës 13:45 ka ndodhur një aksident në fshatin Korish të komunës së Prizrenit në mes dy parashutistëve të cilët janë përplasur gjatë kohës së aterrimit. Me këtë rast janë të lënduar dy persona njëri i moshës 27 vjeç i gjinisë mashkullore me inicialet F.G. dhe tjetra e moshës 23 vjeçe e gjinisë femërore me inicialet F.G. I lënduari mashkull ka ndërruar jetë mbrëmë rreth orës 20:00 në QKUK”, thuhet në njoftim.
Më tej në njoftim thuhet se Ekipet kujdestare të Komisionit për Hetimin e Aksidenteve dhe Incidenteve Aeronautike (KHAIA) kanë dalë në vendin e ngjarjes bashkërisht me njësitë rajonale të Policisë së Kosovës në Prizren dhe kanë ekzaminuar provat në terren.
“KHAIA do të hap hetime për këtë rast dhe Raporti përfundimtar i cili do të përfshijë rekomandimet do t’i dërgohet Qeverisë dhe Kuvendit të Republikës së Kosovës”.
