Elton Debreshit, ish-kandidatit të pavarur për deputet në Dibër në zgjedhjet e 25 prillit, i është vendosur eksploziv në makinë. Policia bën me dije se ngjarja u regjistrua rreth orës 01.00 të mëngjesit të sotëm në Bulqizë, ndërsa nga shpërthimi, fatmirësisht u shkaktuan vetëm dëme materiale.
Nga shërbimet e Policisë janë shoqëruar në Komisariat disa persona që dyshohen se mund të kenë dijeni për rrethanat e ngjarjes.
Debreshi mori 580 vota, si kandidat për qarkun e Dibrës, ndërsa nuk ka ende informacion nëse ngjarja e ditës së sotme ka lidhje me angazhimin e tij në politikë.
Nuk jepen të tjera detaje për ngjarjen, ndërsa grupi hetimor nën drejtimin e Prokurorisë Dibër po vijon me hetimet.
