Adem Nikeziq, 30 vjeç, e mësoi vetëm disa minuta përpara se të paraqitej në gjykatë se e fejuara e tij, Adriana Sylmetaj dhe fëmija që ajo mbante në bark kishin ndërruar jetë në aksidentin tragjik që e shkaktoi ai. I riu qau në mënyrë të pakontrolluar përpara një gjykatësi pasi avokati i dha lajmin tragjik se e fejuara e tij shtatzënë 7-muajshe ndërroi jetë.
“Askush nuk i kishte thënë që e fejuara dhe fëmija kanë ndërruar jetë. Ai e zbuloi disa minuta më parë, pak para se të dilte në sallën e gjyqit. Kur ia tregova nisi të qante”, tha avokati i 30-vjeçarit.
Ai u dërgua në gjykatë me një karrige me rrota për shkak të dëmtimeve që ka pësuar si pasojë e aksidentit tragjik. Nikeziq akuzohet për vrasje nga pakujdesia, drejtim i mjetit në gjendje të dehur dhe sulm.
E fejuara e tij, Adriana Sylmetaj, 23 vjeçe ishte në sediljen e pasagjerit në momentin kur u shkaktua aksidenti. Ajo ndërroi jetë menjëherë, ndërsa makina u nda në dysh.
Nikeziq u ka thënë policëve se një makinë tjetër i ka prerë rrugën dhe më pas është shkaktuar aksidenti fatal. Por prokurorët thanë se Nikeziq ka lëvizur me shpejtësi dhe ka kaluar në semaforë në bulevardin Hylan rreth orës 4:45 të mëngjesit kur humbi kontrollin e makinës dhe u përplas në një pengesë.
Sipas tyre përplasja ka ardhur pasi Nikeziq kishte kaluar një natë duke pirë. Gjykatësi urdhëroi që i riu të mund të lirohej me kusht për 400 mijë Dollarë cash ose garanci prej 700 mijë Dollarësh. Të enjten ai do të dalë sërish para gjykatës.
Çifti priste që të bëhej me vajzë më 12 Prill. Ata kishin porositur një krevat fëmijësh dhe një celular Disney. Adriana Sylmetaj ishte një prej katër fëmijëve të familjes Sylmetaj. Ata janë me origjinë nga Kosova dhe siç raportojnë mediat amerikane, kanë kërkuar që të qëndrojnë në privatësinë e tyre.
